[ بالعامّيّة التّونسيّة ]
لون الهذب ذكّرني بالمهديّة
صحا خاطري و نامت جروحي شويّة
***
ذكّرني بحر أمواجه
مثل الجدايل طايرة هيّاجة
هي الدّواء لمريض طال علاجه
مع النّسمة تجري مشرقي و قبليّة
و إذا القلوب لبعضها محتاجة
تتلاقى فوق رمالها الذّهبيّة
***
ذكّرني صحن الجامع
ما نملّ لو قعدت فيه سوايع
فيه الصّلاة تمحي لي برشة وجايع
و نسمع صدى الماضي يحدّث فيّا
على الفاطمي المعزّ صيته ذايع
و حكاية التّاريخ ديما حيّة
***
ذكّرني حصن زمان
فيه الجنود مسلّحة بإيمان
تحمي الوطن من الظّلم و العديان
تسكّر عليهم في البحور ثنيّة
و إذا لمست بكفّك الحيطان
تحكي فصول المجد و الحرّيّة
***
ذكّرني باللّي راحو
و في شطّ برج الرّاس كي يرتاحو
يتكلّموا في سكاتهم و باحو
بحكمة عظيمة و الحكم سخيّة
يا بنادم اسعى للعمل و صلاحو
و امشي حياتك كلّها بالنّيّة
***
لون الهذب ذكّرني بالمهديّة
صحا خاطري و نامت جروحي شويّة
